Ronflement ( Wonfleman)/ Wonfle

Ooooo mezanmi, Nèg/fanm sa tèlman wonfle li enpechem domi lè aswè. Eeeeee, m poko janm wè yon moun wonfle konsa………… se pa posib, li genlè ak goumen ak move espri nan domi ki fè lap wonfle konsa……….. Papam te konn wonfle wi men, se pa nan eta moun sa, o o………Franchman, m renmen mennaj mwen anpil men, on sèl bagay, li wonfle anpil, dèfwa li tèlman ronfle m’oblije al dòmi nan salon an pou kont mwen.

Sa yo nou sòt tande la yo, se jis on tikal pami kantite pleyen ki egzite sou koze wonfleman. An reyalite, sijè wonfleman se gwo tèt fè mal sosyal pou anpil moun. Yo fe konnen gen 90 milyon ameriken nan USA ki gen pwoblem sa. Lè sa pa yon mennaj, se yon moun nan fanmi an oubyen on zanmi ki wonfle. Souvan, e malerezman, se toujou moun ki pa wonfle an ki viktim plis de wonfleman an. Lè konsa pwoblèm wonfleman konn kraze relasyon, li kraze zanmitay, li konn mete fanmi do za do chak lè solèy kouche, sitou si moun kap wonfle an pa admèt ke li wonfle anpil, ni aksepte chèche swen medikal pou ede konprann e trete pwoblèm sa. Enpak sikolojik, sosyal ka fatal pou moun ki wonfle(wonflè). Konsa tou, pou moun ki pa wonfle, Li vin yon gwo defi pou viv ak on moun kew bezwen nan lavi ou lè moun sa se yon wonflè sovaj.

Ebyen pou tout pwoblèm sa yo, sijè sa merite yon atansyon espesyal pou konnen: Kisa ki wonfleman ?Poukisa moun wonfle? Eske wonfleman se yon maladi? Eske moun kap ronfle soufri lè yap domi? Eske gen remèd pou moun ki wonfle? Ki pwoblèm moun kap wonfle ka devlope pi devan sil pa janm trete?

KISA KI RONFLEMAN?

An jenaral, yo define wonfleman kom yon pwoblèm ki ratresi espas ki pemèt pasaj lè nan gòj lan padan somèy. Sa vle di espas nan gòj vin telman piti nan yon nivo, li fè lè an vin ap goumen ak gòj lan poul travèse desann nan poumon yo lè nap domi.

POUKISA MOUN WONFLE?

Respirasyon se yon mannigèt ki gen 2 faz, oubyen 2 tan. Yon premye faz kote lè an pase nan 2 tou nen yo, travese gòj epil desann nan poumon yo, yo rele sa ” faz enspirasyon“. Epi yon dezyèm faz kote lè soti nan poumon, monte travese gòj, pou soti deyò nan 2 tou nen yo, yo rele sa “faz ekspirasyon“.

Wonfleman manifeste nan “faz enspirasyon” an. Moun wonfle se le gen yon ratresisman nan espas gòj lan pandan moun nan fon somèy a koz de chanjeman poziyon, fòs jèvrèt(tonus musculair), gòj twò pwès( hypertrophy de tissue mous), mòlòlò, lage kò(laxité). Nan kondisyon sa yo, lè an kap pase nan gòj lan souke e vibre lalwèt(la luette) lan. Lalwèt se yon ti sak long bonbe ki pandje nan gòj lan. Se Vibrasyon lalwèt lan lè moun nan ap enspire nan domi ki kreye son ke nou rele “wonfleman”.

KI KALITE GROUP MOUN KI SOUVAN WONFLE?

Kalite moun ki wonfle se moun ki gen gwo kou, moun ki obèz, moun ki gen gwo gòj, moun ki sou( ak kleren) kap domi kò mòlòlò , moun ki gen pwoblèm sinizit oubyen zo nen kwochi( nen bouche), moun ki gen gwo lalwèt, moun ki gen gwo amigdal, moun ki fimen, moun ki pran medikaman pou yo ka dòmi mòlòlò. Moun ki fatige anpil lè yo sot travay ki dòmi kò lage ak fatig, mòlòlò (laxité). Moun ki fèt ak gwo lang.Moun ki antre nan laj avanse( granmoun) paske jèvrèt yo vin fèb avèk letan. Moun ki sansib ak Tanperati ki frèt, epi moun ki strese.

ESKE WONFLEMAN SE YON MALADI?

Nan medsin yo konsidere wonfleman senp( san lòt pwobkem sante) kòm yon pwoblèm sosyal olye de yon pwoblèm klinik( maladi). Sa vle di on moun ki wonfle selman(senpleman) pa konsidere kòm on moun ki malad. Men, si wonfleman akonpaye de lòt pwoblèm tankou etoufman nan somèy, sa vle di ke moun nan sispann respire(oksijènn oubyen lè pa traseve) padan kelke sekond nan fon somèy. Nan ka sa yo konsidere moun sa soufri de yon kondisyon grav e serye ki rele “toufe nan domi” oubyen “etoufmand somèy” ( apnée du sommeil).

ESKE MOUN KI RONFLE SOUFRI LE YAP DOMI?

Moun ki sèlman ronfle pa soufri lè yap domi paske lè an (oksijenn) pase nan gòj lan kan menm, byen ke gen difikilte nan pasaj lè an akoz de ratresisman gòj lan ki vin kreye vibrasyon lè lalwèt souke anpil (wonfleman). Men, piske lè an goumen pou pase nan gòj, ak anpil travay jèvrèt, li posib pou moun ki wonfle sovaj santi yo fatige lè yo leve, yo konn santi bouch yo sèch.

ESKE GEN REMED POU MOUN KI WONFLE ?

Malerezman pa gen yon remèd(medikaman) espesyal pou moun ki wonfle. Kèk medikaman yo te konn itiize pa fonksyone vre, sak fè li difisil pou trete kondisyon sa ak medikaman. Men gen kèk zouti ak manniget moun ka itilize pou ede elimine oubyen amelyore wonfleman. Pami bagay sa yo:

1) Tretman ki fèt avèk lazè ki retire enpen chè(tissus) arebò gòj lan pou kreye plis epas pou lè pase, ENT spasyalis ( doktè ki spesyalize nan gòj, nen ak zòrèy, oubyen otorhinolaryngologie) pratike sa.

2) “Injection Snoreplasty” ( Piki pou geri wonflema) lèw voye lang ou dèyè gòj ou, ou ka santi on pòsyon byen mou ki rele (palè mou) avan ou jwenn lalwet lan. Pati mou sa se li ki kontinye nan goj lan poul pandje e konveti an lalwèt. Ebyen nan Injection Snoreplasty ( Piki pou geri wonfleman) yo enjekte yon likid nan palè mou an ki vin fè li di( rèd) tankou yon zo, le fèt ke li rèd li fè lalwèt lan rèd tou nan yon pwen li paka vibre nan faz enspirasyon, konsa moun nan tou sispann wonfle. Se doktè ki spesyalize nan gòj, nen ak zòrèy, oubyen otorhinolaryngologie) ki konn bay piki sa.

3)pèdi pwa enpotan pou moun ki obèz, oubyen moun ki gen BMI plis ke 30. egzèsis ak chanjeman dayèt ka amelyore wonfleman. Evite manje lè domi rive. kite 3 zèd tan pase avanw al domi lew fin manje.

4)Sispann bwè kleren avan dòmi. Kleren ogmante enflamasyon nan kòw, espesyalamn nan gòj ak nen epi li fè lang ak lalwet mòlòlò.

5)Dòmi sou bò gòch, posisyon sa kenbe pasaj gòj lan ouvè, ak zorye ki leve kou ak tèt pandan figi pozisyone anba tou piti . Evite dòmi sou do, pou sa, Sekirezi do ak zorye pou pa vire sou do nan domi. Moun ki soufri atwoz nan kou ( spondylarthrite cervicale) pap ka pratike modèl sa.

6) Meditasyon avek egzesis dyafragmatik( respirasyon) konn ede, medikaman natirel pou ede debouche nen konn ede tou tankou ( Siro myèl natirèl, sitron melanje ak zonyon) ak Te jenjann ka ede diminye enflamasyon nan gòj ak nen. Avanw domi fe egzesis respirasyon altène( bouche on nen respire nan lot lan pandan kelke sekond epi repete menm bagay lan ak lot nen an), sa ap pèmèt ou konnen kantite lè ak ak kalite lè ki ka pase nan nen yo avanw al domi.

7) Terapi aromatik, Respire oubyen pran sant lwil aromatik ( bon sant) ki ede elimine enflamasyon nan nen ak gòj. Takou lwil ekaliptis. Itilizasyon pansman sou do nen ( bandelette nasal) konn efektif pou trete nen bouche tou.

8) Evite medikan pou fèw domi, yo rele sa sedatif( ki fe kò an mòlòlò). Nenpòt medikan ki ede domi ka pwodwi oubyen agrave wonfleman.

9) Yo konn rekòmande chiriji pou yo ka ouvè plis espas pou gòj oubyen gagann pou pèmèt lè an pase pi fasil, men anpil fwa chiriji pa amelyore kondisyon an. Pou tet sa li difisil pou yo fè chiriji pou moun ki soufri de wonfleman senp selman. Men, Chiriji ka ede anpil tou, lè wonfleman senp lan soti nan pwoblèm nan nen, tankou moun ki ge twòp chè nan nen (adénoide nasal), moun ki gen pwoblèm nan zo anndan 2 tou nen yo( déviation ou deformation de la cloison nasal). anpil fwa wonfleman rezoud(geri) aprè yo korije pwoblèm nen nan ka sa yo.

KI PWOBLEM MOUN KAP WONFLE KA DEVLEPE PI DEVAN SIL PA JANM TRETE?

Si wonfleman pa janm trete li ka vin konplike an etoufmand somèy( apnée du sommeil). Moun ki wonfle ka fe tès pou detemine kijan somèy afkete sante lè yap wonfle. Li vreman enpotan pou moun ki wonfle cheche konsiltasyon pou evalye kalite somèy li. Li enpotan pou wonflè pase yon tès ki rele Polysomnographie(tès somèy). Lè konsa yo ka detèmine si wonfleman afekte kalite somèy lan. Sa ki pi grav, se ke, on moun ki wonfle e ki soufri etoufmand somèy sovaj( sevère) gen posibilite pou li mouri nan domi. Paske etoufmand somèy ogmante posibilite pou soufri ensifizans kadyaj( kè san fòs, tikè), li bay pwoblem konsantrasyon, fatig lajounen, fe moun ap domi sou moun sa atann lajounen, fe moun fe move san fasil, fe moun pa gen enèji. Se pou tèt sa yo konsidere pou tout moun ki wonfle fe yon Polysomnographie(tès somèy) pou detekte etoufmand somèy bonè.

REFLEKSYON

Pou rezime, se pa move lespri ki fè moun wonfle. Men si pito chanjeman poziyon, fòs jèvrèt(tonus musculair), gòj twò pwès( hypertrophy de tissue mous), mòlòlò, lage kò(laxité) ki koz yon ratresisman nan espas gòj (kote pou lè an pase) e ki vibre lalwèt lan nan faz ensperasyon pandan moun nan fon somèy. Gramoun, moun ki obèz, moun ki strese, fatig, moun ki bwè kleren, etc.. fè pati group moun ki souvan wonfle. Byenke, wonfleman pa yon maladi men, enpak wonfleman sovaj telman brital sosyalman ke li enpotan pou chèche atansyon medikal pou konprann rezon wonfleman an ak tretman apwopriye. Wonfleman pa gen medikaman, men gen anpil zouti ak mannigèt pou korije li. Konsekaman, Tout moun ki wonfle dwe konsidere yon Polysomnographie(tès somèy) pou etidye enpak wonfleman sou kalite somèy lan ak konplikasyon tankou etoufmand somèy ki se yon kondisyon grav ki ka debouche sou dè konsekans letal.

Dr. Lariviere

Maklouklou ( hydrocèle)

Anpil moun panse maklouklou( grenn anfle) se 2 boul grenn gason an(testicules) ki anfle. Men, èske se vre?……..Anpil moun kwè ke lè gason fè makloukou se èni(grenn anfle) yo genyen, èske se vre?

Trè souvan, maklouklou konn afekte yon gason fizikman, jan li mache, jan li chita, ak tip de rad li ka mete, epesyalman patalon. Pou tèt sa, li fè ke li difisil pou yon gason kache kondisyon sa sitou lè makloukou an gwo anpil. Le fèt ke maklouklou mal pou kache, li vin tounnen yon sijè piblik ke lòt moun ka obsève e opine de gason ki soufri maklouklou an. Souvan, nap tande moun di: oooo, se movan lè ki fè boul grenn lan anfle konsa,….oubyen, se yon fi li te kouche epi yo fèl kite frekan pou tèt lal mache di sa. Oubyen….se twòp chay ki lou li leve ki fè boul grenn li anfle konsa. Oubyen.. èni li soufri ki fè boul grenn li yo anfle konsa.

Pou tèt jan de kwayans sa yo. Li enpotan pou nou konnen kisa ki maklouklou?Konbyen tip de maklouklou ki genyen? Kijan moun fè gen maklouklou? kimoun ki ka fè maklouklou? èske maklouklou ak èni se menm bagay? kisa moun santi le yo gen maklouklou? Eske maklouklou ka trete?

KISA KI MAKLOUKLOU AN?

Maklouklou fome se le gen twòp dlo ki koule e akimile nan sak(srotum) ki kenbe boul grenn yo( testicules).

Avan 2 boul grenn yo abite nan sak ki nan mitan 2 kwis gason an(scrotum). yo te lokalize nan vant, piske se nan vant gason de boul grenn yo fòme. De boul grenn yo(testicules) sipoze desann soti nan vant pou yal nan sak ki nan mitan 2 kwis gason an gras a yon zanmi ki rele “koulwa bouboun” oubyen “koulwa vaginal” (Processus vaginal).

“Koulwa vajinal” : Bon, imaje koulwa bouboun nan tankou yon ze ki nan pla men nou, e ke nou kenbe ze an menm jan nou kenbe yon ponyen dlo nan men nou pou li pa koule , epi imajine, nap desann ze an nan yon sache sanl pa kraze ni tonbe nan men nou.

Avek analoji sa, ze an reprezante testikil yo( 2 boul grenn gason) ponyèt nou ak men nou ki kenbe ze an reprezante “koulwa vajinal lan“(Processus vaginal), anndan ponyèt nou, olye de zo, se dlo ki anndan men nou( koulwa vajinal). Likid ki anndan koulwa vajinal lan( men nou) rann koulwa vajinal lan mou e swa poul ka pase byen fasil nan yon kanal ki rele kanal enginal. kanal sa lokilize kote kwis nou avèk vant nou kole ansanm( fant janm). Nan langaj zuzu yo rele fant janm nan “Lènn“( l’aine).

Raple nou ke koulwa vajinal lan gen likid(dlo) anndan li, e li volè likid(dlo) sa nan vant lan. Lè timoun fenk fèt, 80% pwa timoun se dlo selman ki fèl. pou tèt sa koulwa vajinal lan sipoze fèmen nan premye lane de vi timoun, poul enpeche twòp dlo(likid) nan vant kontinye koule anndan koulwa bouboun nan.

Ebyen, le koulwa vajinal lan pa femen, li kite dlo kontinye koule ladann, tout dlo sa oblije akimile nan men ki kenbe ze(koulwa vajinal) anndan sak boul grenn nan(scrotum), jis li fòme sa ki rele maklouklou an(hydrocele) kay timoun.

KONBYEN TIP DE MAKLOUKLOU KI GENYEN?

Jeneralman, gen 2 tip de maklouklou. Makloukou ki rete an kominikasyon ak vant nou, ak maklouklou ki pa rete an kominikasyon ak vant nou.

1)Premye tip makloukou an, kise makloukou ki rete an kominikasyon ak vant. nan ka sa koulwa vajinal pa femen pandan premye lane de vi timoun nan, sa fe ke anpil dlo ki nan vant lan vin akimile nan men ki kenbe ze(koulwa vajinal) ki nan sak boul grenn nan( scrotum). Makloukou sa konn varye nan gwosè, li konn rete li anfle tankou yon balon foutbòl.

2)Dezyèm tip de maklouklou an se yon maklouklou ki pa rete an kominikasyon ak vant. kote ke lè men an(koulwa vajinal) ki kenbe ze an(testikil) tap desann ak ze an(testikil) nan sache an(scrotum) li te desann avek on kantite dlo anndan men an( koulwa vajinal) men apre li fin desann nèt, li pa kontinye bwè dlo nan vant lan.

Konsa, Gwose maklouklou sa pral depann de katite dlo ki desann nan sak grenn lan avan koulwa vajinal femen. Sil desann on gwo kantite dlo ebyen lap fe on “gwo maklouklou“, konsa sil desann ak on tikal dlo tou, lap fe on “ti maklouklou“.

KIMOUN KI FE MAKLOUKLOU?

Maklouklou ka afekte gason nan nenpot laj, men le pli souvan se yon pwoblèm ki prezante depi premye jou gason soti nan vant manman yo. li ka aftekte ti bebe gason nan premye lane nan vi li, e maklouklou an konn telman gwo, li konn menm gwose ak tet ti bebe an.

Makloukou an ka afekte jenn gason ak granmoun tou, le konsa se yon kondisyon kelkonk ki envite anpil dlo koule e akimile nan sak boul grenn nan “maklouklou” (hydrocèle), pami kondisyon sa yo, gen enfeksyon, tromatis(aksidan), filaryoz lenfatik( filariose lymphatique= maladi ki akimile anpil dlo nan kò an), ak kansè nan testikil yo.

ESKE MAKLOUKOU AK ENI SE MENM BAGAY?

Lè maklouklou pa janm geri, oubyen li pa janm trete, li konn konplike oubyen transfome an èni. Eni se yon kondisyon kote pati nan trip nou ( entesten) ki sipoze rete nan vant, desann nan sak boul grenn (scrotum) lan atravè kanal enginal lan. Anpil fwa, gason ki leve anpil chay ki lou, ka depase fòs ke vant lan ka sipote epi eksè fòs sa ka pouse on pati nan entesten an (trip nou) nan kanal enginal lan, jiskaskel desann nan sak boul grenn nan(scrotum), yo rele sa yon èni enginal.

Eni enginal, ka fè sak boul grenn yo anfle menm jan ak maklouklou, men se pa yon maklouklou li ye. Paske makloukou fòme se le gen twòp dlo ki koule e akimile nan sak boul grenn nan. Tandiske èni, se yon pati nan trip(entesten) ou ki desann nan sak boul grenn nan.

KISA MOUN SANTI LE YO GEN MAKLOUKLOU ?

Sak boul grenn anfle, se premye siy maklouklou. Maklouklou anpil fwa li pa bay doulè, li pa fè gason paka fè pitit, li pa kontajye nonplis, men li konn anmèdan si li gwo anpil. Gason konn santi sak grenn yo lou, epi li anfle. Raman, li ka bay doulè depandaman de koz lan, espesyalman nan ka aksidan, ak enfeksyon, oubyen filaryoz lenfatik, kay jenn gason ak gramoun.

ESKE MAKLOUKLOU KA TRETE?

Jan nou konnen ke koulwa vajinal lan pran yon lane pou li fèmen apre ti bebe gason soti nan vant manman yo, konsa maklouklou an ka disparet pou kont li pandan premye ane an tou, paske dlo sa ki te akimile an, koulwa vajinal lan reyabsobe li pandan premye lane de vi timoun nan. Konsa, anpil maklouklou souvan resoud pou kont yo lakay jenn gason, granmoun tankou timoun. Defwa, yo konn rekomande chiriji, si maklouklou an gwo anpil nan ti bebe epi apre yon lane li kontinye ap gwosi toujou. Nan ka pa jenn gason, ak granmoun, yo konn bezwen tretman tankou chiriji tou, nan ka kansè, aksidan oubyen enfeksyon, le gen doulè, oubyen lè maklouklou an pa ka rezoud pou kont li.

REFLEKSYON

An konlizyon, lè yon moun fè maklouklou(hydrocèle) se pa kout lè li pran, ni se pa van ak move lè ki anfle boul grenn yo, se pa pote chay ki lou ki fè sa, ni se pa bouch gason yap fè peye pou aktivite seksyèl li divilge. Se pa de boul grenn gason an(testikil) ki anfle. Men se pito sak boul grenn nan(scrotum) ki anfle ak dlo, ki soti nan vant gras a koulwa vajinal lan ki pa femen kay timoun oubyen ki femen ak anpil dlo. E kay jenn gason ak granmoun, se aksidan, kansè, enfeksyon, filaryoz lenfatik e nenpot lot pwoblèm ki kreye kondisyon pou dlo koule e akimile nan sak boul grenn nan.

Enpotan pou diferansye maklouklou ak èni, maklouklou fòme se le gen twòp dlo ki koule e akimile nan sak boul grenn nan, tandiske èni se yon pati nan trip(entesten) lan ki desann nan sak boul grenn nan. Maklouklou pa bay doulè, ni li pa enpeche gason fè pitit, men li ka anmedan e afekte stil de vi gason fizikman, sitou si maklouklou an gwo anpil. Maklouklou komen kay ti bebe nan premye lane de vi bebe gason. Le pli souvan li rezoud poukont li, men defwa maklouklou ka transfome an èni si li pa janm rezoud pou kont li. E chiriji konn pèfome pou trete maklouklou nan ka espesyal.

Dr Lariviere

Gratèl( prurit)

Tande, Grate sou moun se yon wonte…… wi, gratel vle di ou pa benyen……. li vle di ou salòp……. pa kole sou li poul pa baw gratel lan….

Anpil moun ki soufri gratèl souvan konn tande pawòl sa yo nan bouch lòt moun. E anpil fwa pawòl sa yo konn afekte maladif lan mantalman.

Pou tèt gratèl fè zanmitay avèk plizyè lòt maladi ke lòt moun pa konnen apa de pa benyen, e pou tèt grate sou moun dèfwa ka fè moun pase wont, anfen, pou tèt gratèl konn fe mounn gade moun dwòl nan sosyete an, li enpotan pou nou konnen: kisa ki gratèl lan? Ki maladi ki ka koz li? kilè pou nou chèche swen medikal? e kijan li ka trete?

KISA KI GRATEL LAN?

Gratèl : An 1660 yon doktè alman, define gratèl tankou yon sansasyon ki provoke yon anvi ijan pouw grate nenpòt kote nan kòw, enkli pati entim ou. Nan gwo vokabilè doktè, yo rele gratèl “prurit“. Alèkile, ak avansman medsin, yo vin dekouvri ke Kò nou gen kapasite pou pwodwi sibstans ki rele “pruritogen” ( eleman ki provoke gratèl lan). Pami yo gen priritojèn: il 31, il-4, il-13 JAK.

Wap sezi wè ke zafè gratèl lan, se younn nan pwoblèm nan po ki trè frekan. Li se yon pwoblem ki represante 40% nan pami rezon ki fe moun al kay doktè. Li telman frekan, yo menm fe konnen ke kantite moun(40%) ki al kay doktè pou doulè nan do egal a menm kantite moun(40%) ki al kay doktè pou tèt gratèl.

KI MALADI KI KOZ GRATEL?

Pami maladi ki koz gratèl, nou gen:

1) ” Po sèch“, se koz ki pi koni, e ke moun ki gen po sèch ka devlope gratèl rapid, de la tèt o pye. menm jan li trè koni an, li fasil pou trete tou.

2) “Maladi gratèl nan po“. Ki se kondisyon ki soti nan po an selman, sa vle di ke, se pwoblèm nan po an ki pwodwi gratèl lan dirèkteman. Poum site kèk ezanp tankou: gal, inflamasyon nan po( dèmatit), alèji nan po( avek savon, rad, pwodwi chimik), lota, moun ki fe alèji ak medikaman. Moun ki gen ti bèt (ensèk, pinèz, ravet,marigwen) kat mode yo nan kabann.

3) “maladi po ki soti nan lot sistem nan kò an“. Nan ka sa, se maladi ki soti anndan kòw ki vin manifete sou po an ki provoke gratèl lan. Egzanp ki komen nan ka sa se moun ki gen pwoblem nan glann tiroyid( gwo gagann, ak ti gagann), anemi, moun ki gen lesemi, kansè nan san, moun ki gen pwoblem sikyatrik( “moun fou“), pwoblem nan fyèl ak nan fwa. Ak moun ki gen twòp kalsium nan san yo. E Moun ki gen defans yo ki ba. Moun ki gen pwoblèm nan nè yo( newolojik)

KILE POUW CHECHE SWEN MEDIKAL ?

Gratèl ki pèsistan, gratèl ki pa janm kanpe ka anmède kalite lavi moun anpil. yo rele sa “gratèl kronik“. Gratèl sa ka rann laviw san souf menmjan ak on moun kap bezwen lave sanl nan aparèy pou tèt pwoblem ren ki grav(emodyaliz). Lè konsa ou sipoze chèche swen medikal paske gendwa se koz maladi nan san, oubyen nan lòt sistèm nan kò an ki provoke gratèl lan.

Nan sans sa, aplikasyon krèm, ak pomad, lwil, benyen ak fèy, pap ka pase jan de gratèl sa. Ak chans defwa li ka pase pou on ti tan, men apre lap tounen ankò. Pou tèt sa, wap bezwen fe demanch ak doktè pou trete pwoblem anndan kò ou, pouw kontrole tip de gratèl sa.

KIJAN POU TRETE GRATEL ?

Tretman gratèl lan depann de koz lan. Aplikasyon krèm oubyen lwil idratan pandan kèk jou ka rezoud pwoblèm lan sitou lè se po sèch ki koz gratèl lan. Men konsa tou, gratèl kronik konn bay doktè ak pasyan anpil fristrasyon, sitou lè medikaman pou alèji yo pa fonksyone. Tretman avèk lazè, limyè iltravyolè konn ede trete gratèl ki soti nan lòt sistèm nan kò an tankou fwa ak ren.

Malerezman, gratèl ki soti nan pwoblèm sistemik, tankou nan san, fwa ak ren defwa konn pa reponn ak pyès tretman ki egziste sou mache an. Se pou tèt sa yap fè gwo rechèch sou medikaman ki pou atake pruritogen yo(eleman ki provoke gratèl)

Pou konkli, grate sou moun pa sipoze yon wonte…… wi, gratèl pa vle di ou pa benyen.…… li pa vle di ou salòp……. se pa tout gratèl ki kontajye. Gratèl pa yon maladi men plito li se yon manifestasyon de yon pwoblem nan po oubyen nan sistem anndan kò nou.

Anpil fwa nou ka trete gratèl fasil tankou nan ka po sèch, men Moun ki gen gratèl kronik ki pa janm kanpe sipoze wè doktè pou trete koz lan. Konnen ke Li posib pouw pa janm jwenn yon solisyon pou gratèl kronik lan, men, gen espwa ak gwo rechèch ke yap fè pou atake eleman ki provoke gratèl kronik lan, eleman sa yo rele “priritojèn”, pami yo gen “priritojè”: il 31, il-4, il-13 JAK.

La medsin ap fe rechech byen serye pou mete eleman sa yo anba kòd pou ka trete gratèl kronik nan yon fiti pa two lwen.

Dr Lariviere.